الليل خيوطه مشبكه
فارده ضلوعها
منبته خوف ع الجدار
الزرع خضر وارتوى
من نور عنيه
والخوف ضباب
عشش على كل البيوت
الخوف نموت
وطريقنا هو سكته
كانت سراب
بكتب ف قوس الماضي
عن قصه زمان
وحروفها تاهت
منى هى اتلخبطت
واتجمعت ف كاس ازاز
مشروخ.........
وشرخه كان كبير
والحلم طار
سابق حروف الماضى
والحاضر كمان
الليل طويل
مكتوب عليه أسهره
ومافيش بديل
أحلم
أفكر
انتهى
ع المستحيل
مجروحة جرحى
كان بينزف
ألف آهة من الألم
مجروحة......
جرحى بتعشقه
والاه دليل
ف قاموس حياتى كتبتها
ومافيش بديل
والخوف تضيع منى أنا
أصبح ف دنيا المستحيل
حلمى اللي يكبر
جوا بستان الحياة
أصبح محال
ومحال أعيش
مقطوفة من حلم الحياة
طب هى فين .؟
فارده ضلوعي أضمها
من وسط أشواك ألآهات
والاه تأخدنى جوا بحر
من الآهات
أغرق ف صمتى ودنيتى
انزل ف قاع البحر
ألقى الذكريات
والذكرى موجه تهزنى
الخوف تضيع منى أنا
وقت الغرق
أغرق ف بحر الماضى
والحاضر يضيع
والصمت أصبح دنيتى
ومافيش بديل
غير أنى اغرق
جوا بحر المستحيل
غير أنى اغرق
جوا بحر المستحيل
شعر/ خضره ابوليله
كفر الشيخ/ بلطيم