قصيده تحت عنوان حرف

حرف

وقف القلم محتار
ف بداية القصة
القصة كانت حروف
وحروف كانت تايهه
وحرف يعشق ويغضب
وحرف يجرح ويخدع
وحرف يصعب عليه
ينجرح من حبيب
وحرف دأب ف الوطن
والوطن دأب فيه
وحرف قال الوطن
حروفه من جنسي
"الواو"
وطني وح أعيش إليه مديون
بكتب فاتورة حساب
منه أنا واليه
منه .........
عطانى هو كتير
إليه.........
عمرى يادوب يكفيه
والباقى أولادى
وان كنت ح أوصف حروفك
" الواو"
وفيت لكل الناس
وحضنت أحلامهم
" طه"
طينك فى نن العين
وأن طرت كنت ف سماك
مزروعة جوا السنابل
محتاجه ضمه وطن
مغزولة بالفرحة
مطروح آهات الوطن
وململمه فرحى
طرحه سنين المر والغربة
جمعه الفرح مغسول
بنن العين ........
" نون"
نورت بيك الطريق
ومشيت على دربك
وقصدت فيك الوصول
عاشقه تراب أرضك
يالى كتبتك بين رموش عينى
عشقاك وعشقى كان بيروينى
حضناك وحضنك كان بيحينى
رسماك طريق على كف أولادى
كتباك قصيده جوا أشعارى
كحلت بيك العيون إلى بكت جواك
محتاجه أقولك لو ح تسمعنى
شوف قد إيه حبك بيوجعنى
كان نفسى أكون لك
بس ترجع لى